كيفاش تحمي الثورة؟
الثورة التونسية بدات و مهاش بش توفى. ملي البوعزيزي حرق روحو. لقلوب رجعت تدق. الحلم هبط عالواقع كي المطر. غرقو، نفضو و خلع سماه.ليوم الكلنا خايفين على الثورة و نلوجو كيفاش مانضيعوهاش. كيفاش نحميو ثورتنا؟
قبل مانجاوب على السؤال هذا نطرح زوز اسئلة تاخ بعين الإعتبار خصوصية الثورة التونسية في التاريخ البشري:
1) علاش الثورة صارت في ديسمبر 2010 بعد ما خضار حرق روحو و موش في ربيع 2008 بعد ما الرديف تقلبت سافيهة على عاليها ؟
2) علاش الثورة متاعنا مفهاش قائد؟ الحاجة هاذي سابقة في تاريخ البشرية!
بش انجم انجاوب على (1) لازم نشوفو شنية السبب متع الحادثتين و الظروف متع وقتها:
بما يخص الأسباب، بالنسبة ل:
- أحداث الرديف متع ربيع 2008, جات من بعد ماصارت غشة و إستعمال متع أكتاف في قرعة إختيار شكون بش يخدم في الحوض المنجمي.
- حكاية البوعزيزي: هي معروفة و تتلخص في: بوليسة قالتلوا متنصبش، تعاركوا، ضربت بكف، مشى للولاية، حد محب يسمعوا ياخي صب ليسانس على روحو و شعل النار.
الفرق النوعي مابين لحكايتين انو في الحالة الاولى، متع الرديف، الظلم كان موجه لمجموعة بيناما في الحالة الثانية الظلم كان موجه لفرد.
بالنسبة للمعارضين إلي كانوا يحلو في أفامهم من وقت بن علي، الفرق هذا ماكانش عندو دور كبير في نوعية مواقفهم السياسية في كل حادثة. بما أنهم في كلتا الحالتين كانوا مستنكرين إلي صار.
أما بالنسبة لتونسي العياش، الفرق هذاك كان عندو تأثير كبير في تحديد موقف السياسي من كل حادثة.
قبل كل شيء خلينا نتفاهموا، شكون التونسي العياش؟
- بمفهوم موازي لمفهوم إبن خلدون، هو التونسي إلي يعيش في المدينة إلي يتمركز فيها الإقتصاد و/أو السياسة و/أو الإدارة. بعبارة أخرى لبلايص إلي فاهم مناصب إجتماعية. إبن خلدون يقول إلي لعباد هاذم هما أكثر عباد ضاربهم الفساد. الفساد بمعنى الجعالة و الخوف على مناصبهم بما أنهم ينساو حقوقهم بش ما يطيروش من مناصبهم و يكملوا يتشعبطوا في السلوم الإجتماعي. أي بعبارة أخرى هما التوانسة إلي يكونوا الطبقة الوسطى و الميسورة شوية (اكلي بالمفهوم الثوري اسمها "الأغلبية الصامتة").
التونسي العياش، قبل الثورة على الأقل، عندو حساسية من الحياة السياسية و المدنية. معناها يخدم بمنطق اخطاني مل المشاكل و هاني راكش و نورمال كان ضلموني. و إلي يخليه متقبل للفكرة هذيكة هو منطق "الشنقة مع الجماعة خلاعة".
كي صارت أحداث الرديف في 2008, التونسي العياش سمع بالحكاية سمعان بحكم انو مازال مفماش عدد كبير مالتوانسة على فايسبوك (أقرى الظروف اللوطة). و زيد انو فوق ملكل و بما أنها مجموعة انتفضت، التونسي العياش ضهرتلو لحكاية فيها انا بما أنو الجماعة هذوكم مبدئ "الشنقة مع الجماعة خلاعة" مايمشيش معاهم. أي انو التونسي هذاك مراش روحو فيهم و في مشاكلهم و محسش روحو معني بالأمر.
أما حكاية البوعزيزي هي ضلم مسلط على شخص و السيد تشنق وحدو و ماتخلع معاه حد. معناها الحادثة ما دخلتش في إطار "الشنقة مع الجماعة خلاعة" بما انو مفماش جماعة و السيد تظلم وحدو. و التعارض المبدئي
مصارش و أول مرة التونسي العياش حس بالظلم و أقوى من هذاك حس بالظلم لمسلط على عبد اخر. معناها في البسيكولوجية الفرويدية صارتلو حالة تماثل بسيكولوجي. التونسي العياش شاف روحو في البوعزيزي.
هايل ياسر! علاش على خاطر هذاك إلي خلاه يكون موقف سياسي. بما انو الظلم لمسلط على البوعزيزي فيقو على روحو و تذكر إلي هو زادة عايش في ضلم. و هذا هيئوا بش يكون حاضر بش يتقبل أفكار معارضة لنظام بن علي جاية من عند أشخاص ما يعرفهمش، خارجين على النطاق العائلي و الشخصي متاعو. لاكن فما حاجة ناقصة، التونسي العياش تغلغل من داخل أما مازال خايف.... كيفاش طار الخوف؟
و هوني ندخل في الظروف متع الحادثتين...
إلي متفاهمين فيه الكل انو وسائل الاعلام كانت عاملة تعتيم كامل. على عكس أفريل 2008, في ديسمبر 2010 عدد المنخرطين في الفايسبوك و الشبكات الإجتماعية أكثر برشة من عام 2008. زادة برشة عندهم كاميرا في التاليفون. عام 2010 كان زادة عام صارت فيه حملة نهار على عمار من طرف مدونين توانسة شباب. قالوا علاهم إلي هوما مهمش متسيسين، أما في لحقيقة، هما عاودوا خترعوا مفهوم السياسة و صلحوا المفهوم الكلاسيكي الرائج. معناها رجعوا للممو متع السياسة إلي هو عباد تتلم بش اطالب بحق (سيب صالح مثلا) و اللمة متاعهم مربوطة كان بالمطالبة بالحق هذاك. على عكس عباد ملمومة من قبل، في حزب، و كي تتهرد الطالب بحقها، معناها اللمة متاعهم اديولوجية. و فما كلمة تقالت برشة مرات هي الاستقلالية. معناها ماعندي حتى توجه ايديولوجي و ماني تابع حتى حزب. هاذا تأسيس لفكر جديد، مازال مهوش محطوط في خانة. الشيء إلي خلى البوليس السياسي ضايع فيها. على خاطر يلقى روحو قدام عباد، مسمعش باهم و مهمش موجودين في حكك لأرشيف.
هيا هايل برشة معناها قبل ديسمبر 2010, البديل لوسائل الاعلام تهيأ و حضر: فايسبوك، يا بنبك، فيه مليون و نص تونسي. و برش بلوغات و مدونين أنونيم و شعب مسلح بكاميراوات. و فوق مل كل مفهوم جديد و فرشك لسياسة : سياسة الإستقلالية الاديولوجية.
و من شيرة أخرى، المناطق الداخلية و الجنوب التونسي هما المناطق إلي يعيش فيهم تونسي أقل فساد من التونسي العياش، خلينا نسميوه التونسي المقهور: معناها مرمد، بطال و ماعندوش منصب بش يخسرو.
و مازال عندو مبادئ انسانية، و كي صارت أحداث الرديف في آفريل 2008 التونسي المقهور عقل روح فيهم و فاق على وضع و فهم إلي مهوش وحدو و فما برشة توانسة مقهورة. هذاك إلي خلى وعي بالمجموعة
يظهر عند التوانسة هاذم. إنجموا نسميوهم التوانسة المقهورين. أي، أما التونسي العياش في 2008 مايعقلش روحو في التوانسة هاذم. و الظلم كان مسلط على جماعة و التونسي العياش جماعتو هما توانسة عاياشة و فوق ملكل عندو حساسية على المجموعات. الاحداث قعدت في الجنوب التونسي و ما سرحتش خاطر البوليس قهرها و التونسي العياش بحساسية على التجمهر و بخوف على منصب ما شركش فيها. حوادث الحوض المنجمي صلحت لتحضير مجموعة التوانسة المقهورين و في ديسمبر 2010 هما أول عباد ثارت، خاطروعيهم بالمجموعة حاضر من 2008. و هوني كما قال بن خلدون، الثورات و الدول الجديدة تخرج من الريف على خاطر غادي لعباد مازالت على مبدئ إنساني. على عكس سكان المدينة. و هذاك علاش الثورة كانت ممكنة و بالفعل صارت على عكس 2008.
حتى الحد هذا جاوبت على السؤال (1).
السؤال (2): "علاش في ثورتنا مفماش قائد؟ أول مرة تصير في تاريخ الثورات البشرية!"
السؤال كارو يتوجه لعلماء الإجتماع. على خاطروا سؤال علمي يهم تحرك بشري. أما بصيفتي باحث في المنظومات المعقدة إلي على سبيل المثال، تهتم بدورها بالمنظومات هاذي: شبكة النورونات (المخ) ، مجتمعات النمل، المجتمعات الحيوانية، الشبكات الإجتماعية (موش كان بالمفهوم التكنولوجي)، خلاية لبدن، المناخ، إلخ... انجم نعطي إجابة مبدئية.
في ثورة عادية، معناها صارت قبل الثورة التونسية (إيه نعم بش يولي فما قبل و بعد الثورة التونسية)، ديمة يبدا فما قائد ثورة. معناها إنسان مسموع مل كل عندو رأس مال رمزي ، معناها يحظى بثقة عمياء من عند الشعب. الانسان هذا يولي هو صاحب القرار. أي يشخص "مركز القرار" في المجتمع ثائر و عمايل الثورة تزيد و الانسان هذا تكبر الثقة متع الثوار فيه. تحركاتهم هو يقودها. معناها لهنا نحنا قدام ثورة مركزية. المركز متاعها متشخص في إنسان. علاش السيد هذاك بضبط؟ حكاية صعيب بش نجاوب عليها على خاطرها خاصة بكل ثورة: على سبيل المثال، صعود النازية تزامن مع وقت كانت المانية موهان فيها، كما إيطاليا زادة و هتلر و موسليني ماهم إلى أشخاص تمثل الوطنية المتشددة. الأحداث هي إلي خلات ثقة لعباد تكون مركزة فيهم. هذا مثال متع ثورة القرار فيها متمركز في شخص. و كما تعرفوا عطات دكتاتور. خاطر رأس المال الرمزي متع الأشخاص هاذم فات نقطة اللا عودة. و أمثال اخرين : كاسترو، ستالين، القذافي... غيفارا هو نوع من ها الأشخاص إلي كسب ثقة كبيرة في أمريكية اللاتينية و تحول هو بيدو إلى مركز قرار، أما ذكاء غيفارا هو انو قرر بش ما يستقرش و كان إستقر. راهو ولى دكتاتور. أما هو قرر يفرغ الرأس المال متاعو و يعاود يبنيه كل مرة و قعد ديمة ثائر. ماعلناش في غيفارا، الشيء إلي لازم نشدوه حتى لتو هو انو حتى لهنا الثورة هي تحرك إجتماعي و سياسي ناتج على قرارات جاية من مركز قرار متشخص. الشخص هذا هو إلي عندو أكبر رأس مال رمزي. رأس المال الرمزي متاعو، البعض يقول المصداقية، كسبوا من بلاغتو. و البلاغة في المفهوم متع إبن خلدون هي "أن المتكلم يبلغ مقصوده لسامع". معناها معنى لكلام يخلط مغير ماتكون فما حتى تخديم مخ، بالمعنى المقصود (موش المكتوب)، أو نظرية مؤامرة من طرف السامع. أي انو كي يحكي الكلها تفهموا و تعطيه ثقة عمياء. بيعبارات أخرى الشخص هذا هو عبارة على المصدر الوحيد إلي يوجه و يوصل المعلومات مابين لعباد.
في بلادنا نلقاو رواحنا عنا فايسبوك، و مفهوم متع سياسة جديد إلي هو مهوش متأسس على اديولوجية. معناها فما شوية ثقة رجعت من جديد بين لعباد. هي شوية ثقة أما كافية على خاطر التبادل إلي حصل مابين لعباد ولى أكبر برشة بما انو على فايسبوك الواحد مربوط ببرشة عباد. و كي تبدا عاطي ثقة لواحد صاحبك و صاحبك بدورو عاطي ثقة لواحد اخر. مابينك إنت و صاحب صاحبك تولي فما ثقة غير مباشرة. صاحبك هو إلي يعدي المعلومة. ونتي بحكم ثقتك ليه تبرتاجيهة و إلى لا. إنت و قداش ثقتك فيه. الحاصل البلاغة هوني تولي موجودة في البلايص الكل بالتساوي و ماتتمركزش في شخص معين. و القرار معاتش يكون متمركز في شخص بل يولي موزع على لعباد الكل. وناتج على مفاهمة جماعية. هذاك علاش ثورتنا ما فيهاش قائد، ثورتنا هي ثورة لا مركزية. التحرك متاعها في باطنو عندو نفس القوانين إلي تحكم في تحرك قطيع عصافر في شارع لحبيب بورقيبة، قبل المغرب بشوية. و هكة جاوبت على السؤال (2).
باهي و تو من بعد ماجوبة على (1) و (2): كيفاش نحميو الثورة؟
و تو كيفاش نحميو الثورة؟
لازم الثقة ما بين لعباد ترجع بش ينجمو يفيقوا إلي عندهم مشكل في واقعهم إلي لازمو يتصلح.
معناها يرجعو يحسوا على بعضهم و على رواحهم. بش الثقة مابين لعباد ترجع لازم البلاغة بمفهوم إبن خلدون ترجع.معناها المتكلم و السامع يفهموا بعضهم ما غير نظرية مؤامرة و مندسين و تخديم مخ فارغ. كيفاش ترجع البلاغة في المجتمع؟ معناها لعباد تمن بعضها و مغير تخديم مخ و نظرية مؤامرة. لازم أول حاجة لغة اللوح اطيح. اللغة هاذي متصلح لشيء كان لتبهيم المجتمع و قتعو من واقع. بما انو ماكينات الدكتاتورية (تلفزة، ادارات و كمشة قفافة) إحتكرت التعبير في تونس لمدة 23 سنة. حتى من اللغة المكتوبة متاعنا تهتكت و معات عندعها حتى بلاغة. معاتش توصل المعلومة. هاك ريت اللغة إلي مابين الصحاب هي إلي قامت بالدور هذا. هذاك علاش لازمنا نكتبو كما نتكلموا، نكتبوا كما ننطقوا، نكتبوا بتونسي. التونسي إلي يتضمن المفردات إلي تحكي على واقع التونسي. على خاطر المفردات هاذي خارجة من واقعو. معناها لغة اللوح متنجمش تحكي على مشاكلنا كا توانسة. و كيفاش إنجموا نأسسو ديمقراطية كان عنا مشكلة في التعبير على مشاكلنا. كي تكتب بتونسي، ثقافتنا (الشباب) تتقيم ايجابيا و معات حد يغزرلها بعين حقرا. و فوق مالكل بش ثقافة الإبداع تتنشر في المجتمع و في الأفراد، لزمنا نحكيو بلغتنا. كان تحب تشارك أبدى إكتب و طيش عليك قواعد النحو، مايهمكش فيهم. إكتب كما تنطق، أرجع للمعنى الاول متع لكتيبة: إلي هو توصيل صوتك. قواعد النحو ماهي إلا وصف متع لغة و مهاش قانون، إكتب بش تأسس ثقافة جديدة، فرشكة و واقعية قبل كل شيء على خاطرها تمس التوانسة الكل. و نكمل على سؤال : هل أن مثقف راكش يتسمى متثقف؟ موش دور المتثقف هو تنوير العقول في المجتمع إلي عايش فيه؟
كان تحب تحمي الثورة و تكتب بتونسي لتوانسة. حل بلوغ، إكتب أرتيكل على فايسبوك. تنجم تبدى بصحابك يقراولك. و تنجم تلقى عباد تقرى لهنا http://goo.gl/Y02c9 و تعاونك بش تحل بلوغ.
